Annaasaqarsimanermi aliasunnerup tunissutai

Mamisarnitsinni inuttut katsorsarnerup aqqutaaniippoq ulluinnarni oqaasitta pissaaneqarneri, kimittussusaanillu maluginnileqqissinnaaneq.

Ulluinnarni isummatsinni apeqquserneq ajukkagut, alapernaaserfigineq ajukkagut, taamaattussaannartut isigisavut annaasaqareernerup kingorna ersarisseqqittarput.

Annaasaqarnerummi nukia, iluseqanngitsut silarsuaanni malugalugu tigussaanngitsumik inuttut ataasiakkaatut misigissutsivut, ileqquvut, eqqarsartaatsivut, timittalu qisuariaataani paasiuminaassinnaasutut ersersinneqarnialertarput.

Nunarsuarmiooqataavugut timerput aqqutigalugu. Inuttut pinngornerput tarrup iluani aallartittarpoq. Anaanatta illiaata iluani inunngornissatta tungaani ineriartortarpugut.

Nunarsuarmiooqataaleraangattalu oqartarluta inunngortugut.

Taamaammat timeqarpugut ima aamma paasisassaavoq timerput angerlarsimaffigaarput.

Kinamiuna timilik? Tarnerput, anersaarput iluseqanngitsut silarsuaanni, timitta killingi qaangerlugit piujuarpoq.

Iluseqanngitsullu silarsuaanni ilaanni oqaatsit inugaannik misigisaqartarpugut. Inuinnaagattali timerput atorlugu, taamatuttaarlu niperput atorlugu avatangiisitsinnut attaveqarnerput attanniartuarparput.

Tassaniillutillu oqaatsitta pingaaruteqassusaat.

Oqaatsilli oqaasiinnaanngillat, immitsinnut inoqatitsinnullu paasinnissinnaanitsinnut sakkussaallutillu aqqutaapput. Oqaatsittalu ulluinnarni iluseqanngitsut silarsuaanni misigisatta tigussaasunngortinniartuarpai assiliartalersuinikkut.

Taamaammanuna pinngortitamut, avatangiisitsinnut atassuteqarnerput taamak kimittutigalunilu pingaaruteqartigisoq.

Anniaatillu taakkuupput timitta nukissaqarnerata killissaanik aamma ersarissaasartut. Anniaatillu taakkuusarput oqaatsit inugaanni misigisartakkagut.

Qarasattalu sananeqaatimini paasiuminaatsitat aaqqinniassallugit paasissallugit ujartuiffigiuarai.

Taamaammat avatangiiserput, nunarput silarput imarput uumassusillit allanullu atassuteqarnerput mamisarnitta aqqutigiuarai.

Annaasaqarsimanerup tunissutaasa ilagaat, inuunermi piffissamik paasinnittaatsip eqaalleqqittarnera. Meeraanitsinnimi piffissamut paasinnittaaserput ima eqartigineq ajorpoq nalunaaqutamut kisimi aqunneqartutut isigalugu.

Meeqqatummi piffissami massakkorpiarmiinneq ilisimasaraarput. Annaasaqarsimanerup kingorna inersimasutulli piffissamut nalunaaquttamut pigiliussisimanerput ajoqusersorneqartutut ilersarpoq. Piffissaq nalunaaquttap narlorinnerasulli ikkunnaartarpoq, amerlanertigut tukattutut, sammiveqanngitsutut, akuleruteqqasutut misigilertarparput. Tassanilu piffissamut paasinnittaasitta eqaallisarniarnerani eqarsarnaqqaartarpoq. Sungiukkiartuaaqqilerneranilu piffissap kaaviiaartuunera atiartuaaqqilertarlugu.

Ulluinnarni inuunerup qanoq innerata, kaaviiaartuarnerani taammaattussaannartut isigisat allatut isikkoqalertarput.

Uaniiginnannginnerpa immitsinnut angerlarfigeqqinnitsinni suut tamarmik nutaatut takusinnaaqqilerneri? Qanoq innerannik takunnineq. Qanoq innerput, tassa soorlu qullip ikumanerata inneratut eqqartussagutsigu, annaasaqarsimanerup kingorna anniarnerpaaffitsinni aliasunnerpaaffitsinnilu qanoq innerput annikillusutut, millisutut qamilersutut misigisaqaarput. Inuunerup siunertaa apeqqusersorlugu, paasiuminaatsillugu malugiuminaatsittarnera. Annaasaqarsimanerup aliasunnartuata inuinnaassusitsinnut tunissutigisaata ilaanniippoq piffissamik qanoq paasinnittariaaseqarnermut allannguineq.

Oqaatsip 'ullu'p imarisaa, inuup pilersitaanik nalunaaquttap akunnerisa 24-t iluaniisilersimavarput. Ullorlu naasartutut taasarlugu. Massakkullu takorloorutsigu timmissap ullua, taakkua ivasarfii.

Aliasunnitsinnut uteqqeriarutta, oqartariaaserput: Asasama ulloq tooqquvia...

Annaasatta toqquvia, tassa ullua qalliartortillugu timitta, isummatta, eqqarsaatitta misigissusitta ileqquttalu qisuariarfigisarpaa.

Toqusoornermi ulloq eqqaamasaq inummiit inummut assigiinngittaraluaqisoq, annernartumik imaqartarnera peqqutaalluni timitta illersorumalluta sillimaffiginialertaraa malugisarparput.

Assilianngorlugulu una takorloorniariartigu.

Asasap timaata toqquvia, ulloq timmissat ulluisut takorloorlugu, assigaa ullormi tassani uagut timmissatut mannimmik ivasinnaanerput.

Annaasaqarsimanerup kingunerani aliasunnittami takutittuarpaa inuunerup kaaviiaarfiani toqu kingorna anniaat nutarteriuarnera. Inuuneqartinnagu toqoqanngilaq, toqoqartinnagulu inuuneqanngilaq.

Timmissatut ivasutut ulloq atuleraangatsigu inuttut mamisarnitsinni immitsinnut katsorsalersarpugut.

Mamisarnerup aqqutaa, avatangiisitsinni, siulitsinni, uumassusillit allat pissusaanni, inuunerup kaaviiaartup piffissallu ingerlaartuartup iluaniittuarpoq.

Ulluni qaninnerni immitsinnut naalaarluta ima aperisa;

Annaasaqareersimanerpit kingorna illit avatangiisinni suut ilinniarfigaagit?