Taarsiorfiup tunissutai

Ukiup taartalernera malitsigalugu, inuppassuit pisariaqartipparput eqqaamassallugu taarsiorfiup tunissutai suussusersornissai.

Issittormiuunitsinni pinngortitarput aallaavigalugu inuunermut isiginnittariaasitsinnut assiliartaliuunnissaa tulluartarpoq. Qannartatsinnimi misigisagut oqaatsit inugaanniileraangata pinngortitamut saattarpugut, ujartuilluta, apeqqusiilluta akissutissarsisarlutalu.

Inuunitsinni ataasiaannarata tassanngaannartumik pisumik tupannartumik nalaataqartussaavugut, inuinnaanermut ilaaginnarput pissutsit taamaattut.

Taamatulli nalaataqarnermi inummiit inummut assigiinngitsunik qisuariaateqartarpugut.

Arlaatigut nalaataqarnermi inuttut taarsiorfittut taasinnaasarpagut piffissap aaliangersimasup iluani misigisat tunngavigalugit. Misigissutsit suulluunniit tikilluaqqullugit pileraangatta, taarsiorfimmi ersigisagut toqqarlugit kiinneraangatsigit allaaneq ajorpoq ukiup taarnerpaaffiani ullorissanik takunnilerneq.

Taartoqartinnagumi qaamanermik takunnissinnaanatalu ilisarsisinnaanngilagut. Inuunerup marloqiusaanerata uppernarsaataasa ilaat tassa taanna.

Inuttulli taarsiorfimmi piginnaasat pigeriikkat tarrup iluani takujuminaallisinnaasarput. Tassanilu pingaaruteqalertarpoq kisimiinnginnissarput. Tarrup iluaniikkaluarluta inoqateqarnermi aqqutissiuunneqarneq, qaamanermut saannissamut oqilisaataasarput.

Taarsiorfiillu issittumi silap peqqarniissinnaasartup iluani, ilummut saalluta ataatsimoorfeqalersarpugut. Kialaami peqatigiinnikkut uummaarissuserput ataatsimoorfigalugu issersuup eqqaasinniartutut ittarpaatigut.

Nillertoq kialaartorlu. Timitta uummaarissusaanut uppernarsaataavoq silami issittumi aneernermi ulussagut aappillertarneri. Silaannaap minguissusaata puagut immersortarpai silammullu anersaartornitta issimut aalaqartinnerata utertiiviguarpaa, suli maaniittugut.

Taartumi qaammaqqutit

Taarsiorfimmi pingaaruteqalersarpoq inuunitsinni qaammaqqutigut eqqaamanissai.

Issittup seqernata kialaassusaatut ipput, ulluinnatsinni kialaamik attassiuaqataallutik.

Ataatsimoorfigullu illup kialaap iluani amerlisarlutik.

Ataatsimoorluta pinngorartitsineq

Ataatsimoorluta oqaluttuartarneq

Ataatsimoorluta mamisarneq

Ataatsimoorluta pilersaarusiorneq

Ataatsimoorluta pikialaarneq

Ataatsimoorluta qianeq

Ataatsimoorluta illarneq

Ataatsimoorluta neriuuteqarneq

Ataatsimoorluta nutaaliorneq

Ataatsimoorluta kisimiilluta inorsaatigut angusarpagut.

Taamaammat piffissaq tulliuttoq ataatsimoorfiusinnaasut suut orniginiartippigit?

Qanigisannut ingerlateqqiguk taanna orniginartitatut isigisat.

Ataatsimoorluta pilersitsisinnaanerput ataavartumik ingerlaartissinnaalissavarput.

Akunneq naalluariuk.