Piumasat pisariaqartitallu assigiinngissusaat

Ullluinnatsinni malugerpianngitsoortakkagut amerlapput.

Ilaanniipput suut piumasarinerigut suullu pisariaqartinnerigut.

Angajoqqaanngornermi nammineq piumasat pisariaqartitallu illukartillugit meeqqap pisariaqartitaanik sinaakkusersuineq, isummassuineq, aqqutissiuineq ingerlatilertarpagut.

Maluginngitsoorsinnaalertarlugulu nammineq suut piumasarinerlugit suullu pisariaqartinnerlugit.

Naatsorsuutit

Inersimasutut ulluinnarni piumasaqaatit naatsorsuutillu matussuserniartakkagut amerlaqaat.

Angajoqqaajugaanni aappaqaraanni ilaquttat ikinngutillu ulluinnarni attaveqarfigisartakkat, suliffimmilu suleqataanermi rollerpassuit arlariit ullup ataatsip iluani matussuserniartuarpagut.

Namminiussusivippullu rollerpassuarniit ersernerlussisoorsinnaasarluni.

Tassaniusinnaasarpoq aamma inersimasorpassuit stresserlutik timikkut malugilersinnaasaraat; uangami suna pisariaqartippara?

Uanga kinaavungamaa uumap meeqqap angajoqqaarinngippanga? Uanga kinaavungamaa uumap aapparinngippanga? Kinaavungamaa uumap ikinngutiginngippanga?

Kinaavunga uumap suleqatiginngippanga?

Nipeq taanna qannartatsinni nippakkaluttuinnartarpoq aperaluni uangami?

Ulluinnarni imminut naatsorsuuteqarfigisarnerput aamma piviusumiit ungasippallaaleraangat immitsinnut inorsilluta, massakkumiikkunnaartarpugut naatsorsuutit pilersitagut malersortutut illugit pileraangatta.

Uffa immaqa piviusoq allatut isikkoqartoq (nukissaaleqinerusugut, taamaammat kigaallannissaq pisariaqarnerusoq):

Assersuutigalugu, sinnarlussimasugut, meeqqamik napparsimasooqqammerluta nukissaaleqisugut, ilaquttat qanigisat arlaat perululersimasoq paaseqqammeripput, allarpassuillu inuinnaanerup aqqani aqqusaagassat nalaakkaangatsigit pisunut nalimmassanngitsooraangatta, ingerlarsuinnartoorluta naatsorsuutigut piviusorsiorpalaarunnaaraangata, piumasarisarput angunialertarparput, maluginngitsoorlugu suna pisariaqartinnerlugu.

Naatsumik oqaatigalugu:

Piumasaq: Pissutsit allatut ingerlassasut.

Pisariaqartitaq: Pissutsinut nalimmassarneq.

Ilaannikkut piumasarisagut massakkuminngaanneeratik amigaatigisimasaniit allaaveqartarmata, ilaannili siunissami takorluukkanut tunngasuusinnaasarmata.

Tamarmik piffissami massakkumeeqataanngillat.

Taamaammat sungiusagassaavoq unikaallalaartarnissaq, maluginiarlugu piumasarisap piffissaq sorlermiit aallaaveqarnersoq (pisimasut, massakkut, siunissarluunniit).

Pissutsit ilaannikkut aqussinnaanngisagut annertusigaangata, aqutsisisinnaassuserput sukaterilersinnaasarpoq, maluginngitsoorlugu massakkorpiaq sumiinnerluta.

Ersarissaaneq

Uangaqaqqaartinnagu uagoqarsinnaanngilaq.

Imatut paasillugu. uangaassusera ersarissaqqaartinnagu peqqinnartumik uaguussuseqarsinnaanngilagut.

• Nammineq suut pisariaqartinnerlugit ersarissuutikkaangatsigit inoqatigut massakkumeeqatigisinnaanerulersarpagut, immitsinnut malugilluarnerugatta.

• Nammineq naatsoorsuutigisat piviusumut qanillisaraangatsigit massakkumeeqataanerulersinnaasarpugut.

• Nammineq amigaatigisat eqqumaffigalugit inunniit allaniit ujartornagit immitsinnut isumagileraangatta massakkumeeqataanerulersarpugut.

Qarasarput 'akikinnersiuisarmat', ajornannginnersiuilluni, taamaammat sungiusimasagut toqqartuarpai. Taamaaliuleraangatta ilaanni sianiginngisatsinnik attassisoortarpugut namminiussusitsinnut ajoqusersuisinnaasunik.

Suulluunniit sungiusimanngisat sungiusartuarnerasigut oqiliartortarput.

Piumasat pisariaqartitallu ulluinnarni eqqumaffiginerulernerasigut immitsinnut oqilisaattarpugut, massakkumeeqataanerulersarlutalu.

Piffissaq tulliuttoq apeqqutit ukua ullormut maluginiartartigit:

• Piumasara massakkumiippa, pisimasuneersuuaa imaluunniit siunissamiippa?

• Pisariaqartitara piviusorsiorpalaassappat qanormita isikkoqassava?