Ikiortissarsiorneq

Inuunerup ingerlanerani tamatta ataasiaannarata nalaataqartussaavugut inuttut artorsarfiusussanik.

Piffissamilu tassani inuinnaassuserput akuersaarlugu ingerlanissarput pingaaruteqalersarpoq.

Artorsarfimmili kiserliorneq initusarpoq aamma. Uumassaguttalu inoqatigut pisariaqartippagut.

Qanormiuna iliorsinnaasugut immitsinnut paariniarutta?

1. Misigissutsit artornartut, annertuut, qunugisagut nalornissutigut ammasumik eqqartornerisigut. Imaanngilaq kikkut tamarmik sanioqqutagut ammasumik oqaluttuarfigissagigut. Unali pivara, inunnut inuunermi tatigisanut ammasumik oqaatigisinnaanissai.
   

2. Inuugatta uumaniarutta inoqatigut pisariaqartippagut. Pisariaqartipparput inoqaterput peqatigalugu paasineqarneq, paasinninnerlu. Imminut paasineq allaniillu paasineqarneq.

Ilaannili allaniit ikiorserneqarnissaq pisariaqalersarpoq.

Takusarpakka, inuunermi taarsiornerpaat, naqqammittutut misigisut, allamik periarfissamik takunnissinnaajunnaalersutut inissisimasut, assatik isaakkaat oqaloqateqartalerusullutik. Ikiorsiisartup isaaniit isigalugit ima oqarfigisarpakka, imminut ataqqinninnermiit aallaaveqartoq ikiortissarsiorneq.

Imminut ataqqilluta nukigut killeqartut maluginerasigut, inoqatit allat nukinik aallerfissatut periarfissatut isigilersarpagut.

Imminulli nassuerfiginermi - "nukeerutilerpunga, naammatsippunga ikiunnga".

Tassaniusarpoq inuttut imminut inuinnaassuseq akueralugu namminiussuserlu ataqqillugu, nukissanik killeqartut nassuerutiginerasigut inuunerup oqiliartoqqinnissaannut imminnut aqqutissiuutilersartut.

Misigissutsit sullorsuartut ipput

Naanissaata tungaanut ingerlaarfigigaanni naggataani qaamanermut pisarpugut. 

Taava sooq pingaaruteqarpa misigissutsit ammasumik eqqartornissaat? 

Eqqarsaatigigutsigu ammasup killormoortua suua? 

Matoqqasoq. 

Inuinnaagatta tamatta, peqquteqarluta misigissutsit ilai matoortarpagut oqaatiginagit. Imaassinnaavoq ilitsersuunneqarnikuusugut misigissutsit aaliangersimasut nipangiukkaanni taava misigineqarnavianngillat. 

Imaassinnaavoq ilitsersuunneqarnikuusugut misigissutsit aaliangersimasut ersinartuusut, ulorianartuusulluunniit misiginaveersaagassat.

Taamaanngilarli. 

Inuunerput naallugu misigissutsit aqqusaartuartussaavagut suugaluarpataluunniit. 

Misigissutsilli matuukkat nipangiussat pissaaneqalertarput inuunitsinni. 

Peqqinnanngitsumik sunniuteqalersarlutik qanoq innitsinnut.

Tarnikkut timikkullu.

Inuttut inoqatinnullu.

Nipangersagaagamik.

Matoorneqaramik.

Taamaammat pingaaruteqarpoq ammasumik eqqartornissaat. 

Misigissutsit oqaasinngortinneqarnerminni pissaaneeruuttaramik. 

Niperput atorlugu inuunitsinni oqaluttuartuunerput ateqqittarparput. 

Oqaluttuarnitsinni pisinnaalertarpugut aaliangissallugu oqaluttuarput qanoq nanginneqassanersoq.

Qaamanermut pisarpugut oqaasinnguinitsinni, misigissutsit ersigisagut orniginartinngisagut aqqusaareerneranni. 

Taamaammat pingaaruteqarpoq eqqaamanissaa una: 

Inuinnaagatta inuunerput naallugu misigissutsit assigiinngitsut aqqusaartuartussaavagut. Qaangiuttarpulli. 

Imminut ataqqineq

Taavamiuna sooq ikiorserneqarnissaq pingaaruteqartoq? 

Inuunerup ingerlanerani tamaavitta arlaatigut aqqusaartussaavagut misigissutsit artornartut. 

Artorsarfitsinni immitsinnut illersorniarluta, nukigut sipaarniarlugit misigissutsit aaliangersimasut nipangersimatilersarpagut, misiginissai annikillisarlugit. 

Taamaaliorneq nukinik sipaarniarnermiit aallaaveqarsinnaasarpoq.

Nukinillu nungullarsaataasarluni misigissutsinik nipangersaanerput sivitsoraangat.

Inuinnaagatta nukissagut killeqarput. 

Immitsinnut illersorniarluta taamatut iliulersarpugut.

Taamaalinermilu sullorsuup aqqusaarnissaa qunugilersinnaasarparput. 

Allamut saasalersarpugut. 

Immitsinnut illersorniarluta qunugisarput misiginaveersaarniarlugu.

Imaluunniit sullorsuup iluani unittooqqasinnaasarpugut. 

Taarsiorluta. 

Kiserliorluta. 

Inuugatta uumaniarutta inoqatigut pisariaqartippagut. 

Sullorsuup iluani unittooqqagaluaruttaluunniit inoqaterput arlaat sanioqquttussaavoq. 

Ikiorserneqarneq imatut isigineqarsinnaavoq: 

Sullorsuup aallartiffiani qulleq qorsuk ikittoq. 

Ikiorserneqarneq imaappoq qulleq aappaluttuunikoq sungaartunngoriarluni qorsunngortoq. 

Ikiorserneqarneq aallartisaasarpoq sullorsuup aqqusaarnissaanut.

Ikiortissarsiorneq imminut ataqqinninnermiit aallaaveqarpoq. 

Tamatigut kisitta sullorsuaq ingerlaarfigisussaanngilarput. 

Inuunerput ilaanni pisariaqartivissortarparput sullorsuakkut ingerlaqateqarnissaq. 

Qaamanermut apuuteqateqarnissaq. 

Naggasiutigalugu imatut oqarusuppunga: 

Qulleq ikumasoq aappaluttooriarluni qorsunngortarpoq. 

Imaassinnaavoq aperisat siulleq ersarissumik naaggaartoq.

Naamik aallartiffigiuk. 

Inuilli tulleriiaallugit apersorneranni taanna naamiunikoq aappinngorsinnaavoq. 

Ilaanni siulliit aperisagut ersarissumik qulleq aappaluttuutittarpaat. 

Ajunngilaq. 

Alla saaffigiuk. 

Qulleq sungaartunngoriarluni qorsunngortussaavoq.

Imaassinnaavoq aallarnisaasoq tassaasoq nipi ilinniittoq imminut oqarfigisoq:

Aap ikiorusuppakkit. 

Aap tusarnaarusuppakkit.

Aap takuakkit. 

Aap ingerlaqatigerusuppakkit. 

Akunneq naalluariuk.