Inuinnannguugamami misigissuseqarpunga

Misigissutsinik eqqartuinermi taamatut oqartariaaseqarpugut.

Misigissusilerinermili tamatigut oqartariaaseq taanna atorneq ajorparput.

Qaqugukkumiuna taamatut oqartartugut?

Siullertut maluginiagara tassaavoq "inuinnannguugama" imminut saamasumik isiginnittutut nipaqartoq. Inuinnaassuserput akuersaarlugu allanngortinniarnagu inissisimagaangatta soorlu taamatut oqartartugut.

Inuinnannguunerup aamma mikisutut misiginermiit aallaaveqarsinnaasutut nipaqartikkaa soorlu. Assingusinnaavoq pinngortitarsuarmiileraangatta taanna mikisuaqqatut misigineq, qanoq inuuneq tupinnartigineranik misigigaangatta misigissusermut.

Uani pinngilara, allaniit sanilliulluta immitsinnut millisartutut nipaqarneq.

Uanili pivara, inuinnaassuseq takusinnaanerasigut suulluunniit aqqusaakkat pisullu akornanni inuttut ataasiakkaatut qisuariarsinnaatitaanerput akuersaarlugulu inissaqartinnera.

Imatut aamma paasillugu, inuunermi pisuni naliginnaanngitsuni qisuariarnitsinni, misigissuseqarnerput aaliangersimasunik inissaqartinnissaanut immitsinnut periarfissillutalu takutitsisartugut oqaraangatta: Inuinnannguugamami misigissuseqarpunga.

Soorlu oqartariaatsimut allamut atassuteqartoq:

Allatut ajornaqaaq.

Pissutsit aqussinnaanngisat nalaannerasigut misigissutsikkut qisuariarnitsinni inuinnaassuserput inissaqartillugulu akuersaarlugu pinerasigut immitsinnut oqilisaattarpugut.

Pissutsit aqussinnaanngisat - misigissutsit misigisassat

Ullormut qasseriarlutamita misigissuseq arlaat iluaagisarput malugileraangatsigu, eqqarsaatigut aallasattarpat iluaalliorneq qaangerniapallallugu iliuuseqapallanniarluta. 

Iluaalliornermut peqqutaasut sorpassuusinnaapput.

Iluaalliornitta oqariartuutigiinnartarpaa arlaatigut allanngortoqarnissaanik pisariaqartoq.

Avatangiisitsinni ilutsinnilu.

Tassanilu iluaalliuutip aallaavia suussusersornissaa pingaaruteqalersarpoq.

Qarasattali ikiorserniarluta iliuuseqarnissamik eqqarsartitsilersarpoq, misigissuseq paasissutissatut tigunerasigut.

Inuiaqatigiinni, piorsarsimassusermi perorsarneqarnermilu ilitsersuunneqarsimavugut iluaalliorneq aaqqitassaasoq. Iluaalliorneq iliuuseqapallannikkut qaangerneqagassaasoq.

Ilaatigulli iliuuseqapallanniarnermi allaaneq ajorami nunarsuup sinnerata unammilleraatigut, immitsinnullu illersorniapallalertarluta. 

Maluginiarnikuuiuk misigissusermut iluaagisamut tamanna iluaqutaanngisaannartoq?

Alliartortutut iliinnartarpoq. 

Aapparisaq, meerarisaq, qanigisaq eqqugaasarpoq. 

Nammineq taamaaligaangama, qaangiukkaangat eqqarsartarpunga “sooruna taamarsuaq ajornartorsiutigigiga? Uffali misigissuseq namminermini ajortuunngitsoq”. 

Misigissuseq suugaluarpat namminermini ajortuunngilaq. 

Misigissutsit misigisassaapput. Avaqqunniarsarinerasigut immitsinnut unittoortissinnaasarpugut.

Misigissutsit aqqutigalugit timerput eqqissinermut peqqittarpoq. Qasukkartarpoq.

Iliuuseqapallanniarneq qununermiit aallaaveqartarpoq. Qununerlu iliuuseqalersinniartarpaatigut, annanniarluta. Timitta silatussusaata ilagiinnarpaa.

Iliuuseqapallanneq iluaqutaasarpoq inuunerput navianartorsiuleraangat. 

Ullutsinnili misigissutsit aaqqipallatassatut isiginiarneqartarnerani, allaanngilaq ullormut misigissusigut suulluunniit qaangipallanniagassaasut.  

Eqqarsarsinnaassuseq sunik tamanik pingaarnerusutullusooq inissillugu.

Imatulli misissuinerit takutissimavaat: Inuusugut misigissusillit eqqarsartartut. 

Tassa imatut paasillugu, misigissutsit inuunitsinni pingaaruteqarluinnartuullutillu eqqarsartaasitsinnut sunniuteqarlutillu paasititsisuusartut. 

Amerlanerpaasugut imatut isumaqartarunaraluarpugut inuusugut eqqarsartartut misigissuseqarsinnaasut.

Ulluinnarni misigissuseq arlaat iluaagisara malugileraangakku qaangerniapallakkunnaarlugu, inissaqartillugu pisalernerani paasilerpara, eqqarsaatima ajoqusersortaraannga misigisaqarninni. 

Eqqarsaatit aqutsisuutinnagit, misigisaq tikilluaqqullugu inissaqartillugu, nipituumillu oqaatigisalernerani qununarunnaartarpoq.

Qununarunnaarneranilu qarasama iliuuseqapallanniartartup nipaa aanngartarpoq.

Timigalu eqqissisimanerulersarluni. 

Massakkumeeqataaqqilerlungalu.

Piffissarlu iliuuseqapallanniarnermut atortarnikuusara, misigissusermik inissaqartitsinermik taarsernerani iluaalliorneq qasukkariartortarpoq. 

Misigissusermi sunaluunniit namminermini ajortuunngilaq. 

Pingaarutilimmik paasissutissiiniartoruna.

Taamaammat piffissami tulliuttumi unikaallaqatigilaannga misigissuseq sunaluunniit qaffakaanerani oqarluta: Ataqqillugu inissaqartippara.

Akunneq naalluariuk.