Inuunitsinni oqaluttuartutut niperput ersarissarnera

Inuiaqatigiit ilutsinni tarnikkut ikiorserneqarnissaq aatsaat taamak eqqumaffigineqartigaaq.

Qujanartumik.

Nunatsinniinnaanngilarli, nunarsuaq tamakkerlugu tamanna annertuumik ukkatarineqarpoq. 

Soormita? 

Nunarsuaq tamakkerlugu isiginerani, inuiaqatigiittut oqaluttuarisaaneq avaqqunneqarsinnaanngilaq.

Inuiaqatigiit iluanni inunnut ataasiakkaanut tulluarsaanermi, sullissiniarnermi, piorsarsimassutsip iluani inuk ataaseq pineqarniartuarnerani (qallunaatut: Individualisme), inuiattut ajornartorsiutit ersarissiartortutut isigineqarsinnaapput.

Pissutigalugu, inuit ataasiakkaarluta anniaatigut naalliuutigut, paasiuminaatsitagut, allanngortikkusutagut kisitta akisussaaffiginagillu kisitta piginnginnatsigit.

Inuit tamaavitta sakkortuumik nalaataqartussaavugut, ataasiaannarata.

Tamanna naqissusereernerani, una ersarissagassaavoq aamma:

Inuunermi ataasiakkaatut sakkortuumik nalaatagut aammalu misigisagut, tamaavimmik annermut atassuteqarput, tassalu inuiaqatigiinnut.

Peqqutaalu imatut inissinniarneqarsinnaavoq:

Tamatta inunngortarpugut piffimmi aaliangersimasumi, nunarsuup oqaluttuassartaata ilaanni pisut aaliangersimasut annermik minnermilluunniit sunniuteqartuarput inuttut ataasiakkaatut atukkatsinnut.

Ivinguak Stork Høegh: Tulukkat inooqatigalugit I + II

Inuttut ataasiakkaatut imaluunniit inuiaqatigiittut

Qanormiuna inuunitsinni oqaluttuartutut niperput ersarissarsinnaagipput?

Tamanna naatsumik imatut nassuarneqarsinnaavoq: Inuttut ataasiakkaatut oqaluttuassartarput siulitta oqaluttuaannut ilaallunilu ilaanngilaq.

Imatut paasillugu, aap angajoqqaatta inuunerat uagut inuunitsinnut ilusilersueqataapput,

taakkullu siuaavisa inuunerat siuliisalu inuunerisimasaat tamarmik ataqatigiipput.

Taamaakkaluartoq inuttut ataasiakkaatut nammineq oqaluttuarnerput ersarinnerusumik nangissinnaalertarparput inuunitsinni anniaatigut, paasiuminaatsitagut allanngortikkusutagut, amigaatigisagullu ersarissumik oqaatigisinnaaleraangatsigit.

Allatama siuliani assersuut atoqqissavara:

Taamaattukkormiuni [nammineq oqaasertaleruk kikkormiuunerit]

peroriartornermi pissusilersuutit, periutsit timitaliinerit oqaasinnguinerit

imaluunniit oqaasinngortinneqanngisaannakkat,

meeraanermiit timikkut misigissutsitigullu ilisimalikkat,

ersinngitsumik pissaaninittartut ulluinnatsinniittut sumiissuseraangatsigit niperput ersarinnerulersarpoq.

Oqaatigerusuttuakkat, oqaatiginngisaannakkat ersinngitsumik pissaaneqarnerat piuneerukkiartortarpoq nammineq niperput atorlugu oqaluttualeraangatta.

Massakkumi pisimasut pisussallu

Inuunitsinni oqaluttuartutut niperput ersarisseqqittarpoq massakkumiinnitsinni inissikkaangatsigit makkua:

Pisimasut nammineq aqqusaarsimasagut, siulittalu inuunerisimasaannut tunngasut kinguaariinnut ingerlaqqittut ataqatigiissilernerasigut.

Tassuunakkullu massakkumiinneq ajornannginnerulersarpoq.

Qannartatsinni uniffeqanngitsoq, ajoqusersuisoq, paasiuminaatsitaqartoq ersernerlutitsisoq paasineqaraangat inissiisarpoq.

Tassanilu siunissarput aamma ersarinnerulertarpoq. Pissutigalugu naleqartitagut pingaartitagut nammineq pigalugit tigummileraangatsigit, nammineq iliuusissanik ujartuisinnaanerput aamma ajornannginnerusumik timitaliiffigisinnaalersaratsigu.

Taamaammat oqartariaaseq una "Ataasiullunilu pingasuugami", aamma piffissamut tunngatillugu atorneqarsinnaavoq: Pisimasut, massakkut siunissarlu.

Imatut paasillugu inuunermi massakkumiileraangatta, unittuussutigut pisimasut imaluunniit siunissami pisinnaasut annilaangatitsisut massakkumiit kajungerisutut inissisimaneri mumisikkaangatsigit tigussaanerulertarmat inuuneq maaniittoq.

Eqqarsaatigut timitsinneeqataasinnaanerulertarput, timittalu malugisinnaalersarpaa massakkumiinnerput.

Taamaammat unikaallalaarluta apeqqut una issiaqatigisigu:

• Inuunerup oqaluttuassartaani sukkut nipiga ersarissarsinnaavara?

Ersarissaanerput atorlugu inuunitsinni oqartussaassuserput aallaavigeqqilersarparput.

Ersarissaalluarina.