Qannartama meerartaa

Inuttut ineriartornermi imminut paasinnittariaatsimut annertusaasinnaasoq itisiliisinnaasorlu tassaasarpoq qannartatta meerartaa.

Soormita? Siuliani eqqartorpara matuukkat, sungiusimasat atorfeerunnikut ajoqusersuisut pissaaneqalertarneri ersinngitsumik.

Taakkunaniit nipi ersarissumik oqarusuttoq tassaasinnaasarpoq qannartatta meerartaa.

Piffissami aaliangersimasumi ineriartornitsinni oqaatsit inersimasut paasisinnaasaannik oqaatigisinnaasimanngisagut timitsinniilertarmata.

Inersimasunngornermi timerput aqqutigalugu periutsit ileqqullu attattarpagut qarasatta ajornannginneq ujartortuarmagu.

Ajornannginnerli tamatigut pitsaanerpaaneq ajorpoq.

Imatut paasillugu meeraanermi uumaniarnitsinni annanniutiginikuusagut, inersimasunngornermi ajoqutaalersinnaasarput.

Soorlu oqaluttuatoqqatsinni Kaassassuup pissaap inuata pamiorsuaniit nermussaareerluni katagarpai pinngussat allinaveeqqutini.

Uaguttaaq inersimasutut ullutsinni allinaveeqqutigut katagarsinnaavagut.

Siuliani allatara eqqaaqqissavara:

Imaanngilarmi peroriartornermi ilikkarsimasat sungiusimasat inuunerup sinnerani iluaqutissatut atuuttut. Imaassinnaavoq iluaqutaajunnaareerlutik attanneqarnermisigut ajoqutaaginnaleqqasut.

Qanormiuna inersimasutut allinaveeqqutigut katagarsinnaagigut?

Tamakku apeqqutini alapernaatsuni aallartissinnaapput.

Sooruna imatut misigiuartunga?

Sooruna imaakkaluarlunga imatut pisoqartuartoq?

Una pisoq sumununa inuuninni pisimasumut allamut eqqaanartikkiga?

Qanga assingusumik inuuninni misigisaqarnikuuvunga?

Soorlu toqqissiviilliorneq peroriartornermi ulluinnarsiutigisimagaanni, inersimasutut toqqissisimasumik inuuniarneq nalunarsigaangat, oqarsinnaanissaq: Toqqissisimaneq amigaatigisimavara, ujartortuarsimallugulu taamanili.

Massakkullu inuuninni inersimasut allat toqqissisimatitsinissaat pisariaqartinngilara,

imminulli toqqissisimatissinnaanissara pisariaqartippara.

Immitsinnut angerlarfigigaangatta qannartatta meerartaa toqqissisimalertarmat.

Amigaatigiuarsimasap ujartuarnera

Allaaneq ajorpoq toqqortaanneq.

Meeraanermi toqqortaanneq nuannaralugu toqqoqattaarsinnaavugut nassaarineqaraangattalu qiimmaallalluta illariarluta, aatsaallu toqqoqqilluta.

Inersimasunngornitsinni toqqortaanneq amerlasuunut nuannersortaa namminermut tunngajunnaarsimasarpoq.

Meeqqanut nuannersortaa pigitinneqarnerusarpoq.

Assersuutigalugu meerarisaq toqqoqattaartoq ujarneqarusulluni nilleqattaartoq: kuukuuuuk... Angajoqqaatut qatsutereeraluarlugu meeraq pillugu toqqortaaqataaneq, ujaasisuusarneq.... "aa sumiippamita? Maaniinnerpa... aa aajuna"

Soorlu taanna ileqqoq, aamma misigissutitsigut amigaatigisarsimasagut toqqortaattutut pissusilersortuartut.

Avatangiisitsinnilu ujartortuarnerasigut qamaniittoq amigaateqartoq naammatsinngisaannartutut pilersarpoq.

Unikallallutali inersimasutut tamanna toqqortaannerup ileqqua qimerluuleraangatsigu,

allamik immaqa iliorsinnaaneq ajorpugut illaannalerluta.

Pissutigalugu inuunermi pingaarutillit allaaneq ajoramik toqqortaattuartut.

Nassaarineqarlutillu nutaanngorlutik toqqortaraat, nutaanngortoq nassaarineqarnissami tungaanut. Taamatullu ingerlaartuarlutik.

Pisariaqartissimasat amigaatigisimasallu peqqinnartumik ataqatigiissumik pisimanngikkaanni,

inuunermi taamaattussaannartut isigilersarpagut.

Allaanngilaq nammineq inuunitsinni oqartussaassuseqarata inuusugut.

Pisunut pilersitseqataasutut inissisimanata, pineqartutut inissisimalluta.

Taamaammat inuunermi pilersitsisooqataanerput ersarissarnerasigut inersimasutut akisussaaffik tigullugu, allinaveeqqutigut iperarsinnaalersarpagut.

Soorlu assitaliussami inuusaaqqat, qaleriiaallutik ataqatigiissaalertarput.

Inunngornitsinniit ukiugut tamarmik aamma taamatut isigisinnaavagut.

Qannartatsinni ukiorisimasagut qaleriiaapput.

Qallikkut massakkut ukiorisatsituulli isikkoqarsinnaasarpugut.

Qannartatta meerartaanut allanngueqataasumik, toqqissiviilliortitsisumik aammalu amigaateqartitsisimasumik aqqusaagaqarsimatilluta, kingunerisarpaa qannartap meerartaa avatangiisitsinni salliulerluni ujartuilersarnera.

Tusaaneqarnissani, paasineqarnissani takuneqarnissami tungaanut.

Imminut tusarnaarsinnaalersinnata allat tusarnaarnerat amigartutut misinnartuassooq.

Taamaammat inersimasunngornitsinni periarfissariuarparput qannartatta meerartaa perorsaqqissallugu.

Imatut paasillugu, inersimasutut akisussaaffipput tigumminerasigut qannartatta meerartaa, inersimasoq toqqissisimaffigisassani naapissinnaalersarpaa, uagut aqqutigaluta.

Pissutigalugu uaguummat nunarsuarmi kisitta immitsinnut tamakkiisumik paasisinnaasugut.

Qannartatta meerartaata aqqusaarsimasai, amigaatigisimasai, anniaatigisarsimasai nalunngeqqissaarpagut.

Taamaammat uaguuvoq aamma ujartuinermi apeqqusiinermilu akissutaanik tigumminnittuusut.

Taamaammat ullumikkut unikaallalaarluta immitsinnut naalaarta.

Naalaarnermi apeqqutinut ukununnga akissutaa tikilluaqqusigu:

• Qannartama meerartaa toqqissisimalluni oqarsinnaatitaalluni paasiguniuk, sunamita amigaatigisarsimasutut oqaatigissavaa?

Imminut naalaarluarina.