Taamaattussaannartut isigisat allanngortinniarneri

Ulluinnarni inuunerput ileqqunik ulikkaarpoq.

Ukiorpassuit kinguaariillu arlariit ingerlaartitaannik.

Ingerlateqqitaannillu. Annertunerpaartai apeqqusersornagit taamaattussaannartut isigisagut,

ullutsinnut tulluarunnaareeraluartut attatiinnartarpagut.

Soormita?

Suulluunniit taartumiit takkuttut, qaamanermik qinngorfigiteqqaaratik suussusiviat takujuminaattuarpoq.

Taamaammat taamaattussaannartut isigisat apeqqusersulernerasigut, taartumiit qaamanermut appakaakkiartulersarpugut. Taamaalioqqaartinnatali taartumiinneq ersinarsinnaasarpoq.

Taartumi ersigisagut qaamanermi ersarissisarput.

Ersigisagullu ineriartuutissaraagut inuunitsinni.

Taartumiittulli ersigisagut avaqqutaartuarnerasigut, immitsinnut ersisaalersarpugut suussusiviat takoqqaartinnagu siumoortumik naatsorsuutigiinnaleraangatsigit ersinavissortuusut.

Inuinnaassusitsinnummi ilaapput anniarneq, naalliunneq, artorsarneq, paatsiveerusimaarneq kiserliornerlu.

Nukiillu atukkat aqqutissiulersarput anniarniinnarnissamut, naalliuinnarnissamut, artorsaannarnissamut paatsiveerusimaaginnarnissamut kiserliorniinnarnissamullu.

Imaluunniit...

Iperaanissamut kiffaanngissuseqalernissamullu.

Taamaattussaannartummi isigisat, inuunermi kalunnertut parnaarsukkatut ippug.

Piffissallu ingerlanerani parnaaqqaannalernerani nikissinnaajunnaartutut misigilersarpugut.

Tassaniusarpoq inuttut naammatsiffimmi apeqqusersulertarigut, pissutsit taamaattussaannartut isigisat ilumut taamaattuaannassanerpat...

Kiap matuersaat paaraa?

Eqqarsaatigut taamaattussaannartumiit taamaattariaqannginnermut pileraangata, inuunermi ulluinnatsinni maluginngisagut attatiinnakkagut takusinnaalersarpagut.

Nammineq matuersaammik paarinnittuulluta paasilersarparput.

Sorliit peqqinnanngitsumik ulluinnatsinni utikajaarfiginerigut, sorliillu ineriartorfissamik periarfissiisarnersut.

Kalunnerit parnaaqqasut uninngaannarfiginagit ammarsinnaanngortarpagut.

Nikinnaveeqqutigut katagalersarpagut.

Inuunermilu kiffaanngissuseq misigileqqinnerasigut iperaaneq timitaliiffigisinnaalersarparput.

Iperarlugit taamaattussaannartut isigisagut:

Iperarlugit allinaveeqqutigut.

Iperarlugit naatsorsuutigut piviusorsiorpalaanngitsut.

Iperarlugit upperisagut atorfeerunnikut.

Iperarlugit isiginnittariaatsit tulluukkunnaarnikut.

Inissaqalertarpullu ineriartuutigisinnaasagut:

Massakkumeeqataanerulerneq.

Piviusorsiorpalaartumik naatsorsuuteqarneq.

Nangaanerup iluaqutissartaa inissaqartinnerulerlugu.

Naleqartitat ersarissarnissaanut inissaqalerneq.

Isiginnittariaatsit tulluartut alapernaaffigalugit misissuataarnissaanut ammaffeqalerneq.

Taamaammat ulluni tulliuttuni issiaqatigilaartigit apeqqutit makkua:

• Alapernaallunga inuunera qimerluulerukku, suut maluginiarpakka?

• Maluginiakkanni suut unittooqqasutut misinnarpat?

• Maluginiakkanni suut ammasutut pissanganartutut misinnarpat?
  

Alapernaalluarina.