Takuneqarneq takunninnerlu

Ulluinnarni takusagut, isigisagullu qanoq annertutigisut ilumoorluta takullugillu isigisarpagut?

Inuunermi ulapaarfiusumi unikaallalaarnissaq pingaaruteqartarpoq.

Unikaallalaarnerup namminiussuseq ersarissumik takusinnaanissaanut aqqutissiiuussisarpoq.

Kinaavunga?

Suut pisariaqartippakka? Suut pingaartitaraakka?

Immitsinnut maluginiarnitsinni allat malugalugillu takulluarsinnaalersarpagut.

Immitsinnut ataqqinitsinniit allat ataqqinassusaat ersarissisarput aamma.

Killissakka sumiippat? Inoqatima killissaat sumiippat?

Inuunermi takuneqarneq takunninnerlu pingaaruteqarnerpaat ilaanniipput.

Pissutigalugu namminiussuserput nunarsuarmi tunissutaallunilu annertusaataammat ajunngitsunut.

Inuunermili aqqusaakkat imaannaanngitsut takuneqarnissamut qununarsisutut misigititsilersinnaapput.

Siuliani eqqartornikuusara uteqqissavara:

Taamaattukkormiuni [nammineq oqaasertaleruk kikkormiuunerit]

Peroriartornermi pissusilersuutit, periutsit timitaliinerit oqaasinnguinerit

imaluunniit oqaasinngortinneqanngisaannakkat,

meeraanermiit timikkut misigissutsitigullu ilisimalikkat,

ersinngitsumik pissaaninittartut ulluinnatsinni.

Tassanilu takuneqarneq amigaatigisimagaanni, inuunerup ingerlanerani takuneqarnissaq qununartutut misinnarsisinnaasarpoq.

Imaluunniit takuneqarnissaq allaniit ujartortuartutut pisinnaasarparput. Takuneqavinnerli ajortutut misigilersinnaasarluta, immitsinnut takuneq ajulernitsinni, allaniit isiniit isiginiarneqarneq inittortangaarmat.

Inuunermi artornartut suugaluarpata takutikkusunngisatsinniipput anniaatitsinnut oqilisaasussat.

Aatsaammi immitsinnut takusinnaaleraangatta misigissutsigut anniaatigullu tigussaanerulerlutillu ersarissisarmata.

Tamannalu anguneqarsinnaavoq inoqatigut ilagalugit.

Allaniit takuneqarneq, anniarnermi ajornerpaaffimmi kisimiinngitsutut misigititsisut taakkuusarput aamma immitsinnut takunnilernitsinni isiginnittuusut.

Naatsumik nassuassagaanni:

Takunninnerup takuneqarnerullu aallaavigaat asanninneq.

Asanninneq tamatsinni ilisaralugu malugiuagarput oqaasertaleruminaatsittagarput.

Qamuunali toqqissinermik eqqissinermillu misigititsisartoq, oqiliallannermik anersaajallannartoq.

Alapernaassutsip tarrarsuutaa

Alapernaassuserlu aqqutigalugu immitsinnut takunnissinnaanerput annertusarsinnaavarput, allanullu takunnissinnaanerput ersarissarlugu.

Siumoortumik eqqarsaatersuutit atorfeeruttarput alapernaassuserput aqqutigalugu isiginnittuuleraangatta.

Inoqatit nalilersorunnaarlugit naleqqatigalugit isigilersarpagut, inuunerullu tupinnartua malugeqqilersarparput.

Assigiinngissutsit ajoqutaajunnaarlutik inuunermi allanngorartumi tunisisuusarput alutorsaatinngorlutillu.

Assigiissutsit ajoqutaajunnaarlutik inuunermi paasinninnermik annertusaaqataalersarput.

Anniaatit avaqqutaarniarsariunnaarlugit immitsinnut eqqissisarsinnaalersarpugut,

takunninneq takuneqarnerlu aqqutigalugu.

Namminermiillu aallartittuarpoq.

Imminut takunissamut akuersaarneq.

Immitsinnut akuersaarluta ammaffigalugit suugaluarnersut avaqqunniarsarisagut,

isaatigut toqqarlugit isigileraangatsigit qamaniittut taarsiortitsisut qaamanermik qinngorninillutik ersarissisarput.

Avammut sammiunnaarluni qamunga sammileraangat.

Eqqissineq

toqqissineq,

massakkumiilerneq malunnarsisarpoq isigisoq qamunga saamasumik sammiveqaleraangat.

Avammullu qiviarnermi massakkumiisitsilersarpoq takunninnerup takuneqarnerullu ataqatigiinneri ersarissigaangata.

Ulluni tulliuttuni immitsinnut alapernaaffigaluta, inuillu asasagut asasigut nutaanik isinik isiginiartigit, apeqqutit uku aqqutigalugit:

• Uanni isinik nutaanik qiviarninni suna takuara?

• Ilinni isinik nutaanik qiviarninni suna takuara?

• Inoqatinni isinik nutaanik qiviarninni suna takuara?

Alapernaalluarina.