Tarnikkut ikiorserneqarneq immikkut pisinnaatitaaffiussanngikkaluarpoq

Psykologitut misilittakkat aallaavigalugit ilisimalikkat, paasisat eqqarsaatersuutillu siammarterfiannut tikilluarit.

Inuttut nammatagut immikkuullarissutsiminni naleqqatigiipput.

Inuiaqatigiit ilutsinnili tarnikkut ikiorserneqarnissamik periarfissat killeqarput.

Taamaammat ilisimasakka, misilittakkakkalu allattuganngorlugit ingerlateqqikkusuppakka.

Qulequtsiussamami ersarissarpaa, tarnikkut ikiorserneqarneq immikkut pisinnaatitaaffiusutut (qallunaatut privilegie) inissisimasoq, nunatsinniinnaanngitsoq nunarsuaq tamakkerlugu taamatut inissisimavoq.

Tamatta inuunitsinni sakkortuumik nalaataqartussaavugut, ataasiaannarata,

tamannami uumassuseqarnitsinnik naqissuseeqataavoq.

Kinaluunniit anniaammiit illersorneqarsinnaanngilaq.

Unali eqqaamasassaavoq; kinaluunniit anniaammiit ajorunnaarsinnaavoq. Kinaluunniit anniaammiit ineriartorsinnaavoq.

Inuttut ineriartorninni ujartortuarsimavara inuunermi ilumoortoq.

Psykologitut ilinniakkamik toqqaaninniit ilinniakkap naammassineranut.

Atorfinniit namminersulerninnullu aqqutissiuussisimavoq taanna ujartuineq.

Qannartama silarsuaata imartussusaaniit,

suli paasisimanngisanniit,

suli qulaajarsimanngisanniit,

suli oqaluttuarisimanngisanniit

alapernaassusitsinni naapeqatigiitta inimi maani (blog-ip iluani)

ammaallugillu taakkua inuunitsinni suli paasisimanngisagut.

Inuttut imminut paasinerunissaq ujartugariuarakku, tamannalu allattarninni ingerlateqqikkusullugu siammarterfittut pilersippara blog una.

Tarnikkut ikiorsiisartutut sulininni imminut ilisimaarilluarnissap pingaaruteqassusaa siusissukkut paasinikuuara.

Tassanilu alapernaassutsip nukinga, sullitannuunnaanngitsoq imminullu aamma atorluarukku

inuunermi pitsaassuseq qulakkeeruminarnerulertarmat.

Ilisimasaqarnerulli imminut akerleriissusaa ersarissassallugu pingaarsoraara,

tassaasoq ilikkakkat annertusiartornerani,

nalunngisat annikilliartornerat.

Inuunerup soqutiginassusaanut, inuunermullu alapernaassuseqarnermut toqqammavileeqataasinnaavoq taanna isiginnittariaaseq.

Pissutigalugu, inuttut ineriartorneq inuunerput naallugu periarfissaammat.

Periarfissat atorlugit ingerlatilluta ilikkakkat annertusiartortillugit nalunngisat annikilliartorneranni kiffaanngissuseq naassaassaammat aamma.

Kinami inoorusukkami suna tamaat nalunagu?

Nalunartummi inuunitsinni tupinnartoqarnisaanik inissaqartitsisuupput.

Soorlu Socratesip oqaatigisimasaata naqissuseraa: "Ataasiinnaq nalunngilara: tassa nalunngisaqannginnera".

Sungiusimasat sungiusimajunnaarsarfiat

Peroriartornitsinniit sungiussimasat inersimasunngornermut attatiinnakkat,

ilai atorfeerutereeraluarlutik sianiginngisatsinnik attannerasigut ajoqusersuilertarput inuunitsinni.

Tamakku blogip imarisartagassaanut ilaapput.

Psykologitut inunnik ataasiakkaanik ikiorsiininni misilittakkat annertusiartorneranni,

una ilumoortutut ersarissigaluttuinnarpoq: Inuttut ineriartuutigiunnaakkagut, unittuussutigisartakkatta sorlaqarfigaat sungiusimasat atorfeerunnikut attanneqarneri.

Assersuut:

Taamaattukkormiuni [nammineq oqaasertaleruk kikkormiuunerit]

peroriartornermi pissusilersuutit, periutsit timitaliinerit oqaasinnguinerit

imaluunniit oqaasinngortinneqanngisaannakkat,

meeraanermiit timikkut misigissutsitigullu ilisimalikkat,

ersinngitsumik pissaaninittarput ulluinnatsinni.

Soorlu angajoqqaaq kamajasuusimappat

kamannginniassammat meeqqatut sungiunneqarsimasoq:

Ileqqorissaarnissaq, nammineq misigissutsit naqisimallugit

allat ilorrisimaarnissaanik qulakkeerinninnissamik sillimajuarneq.

Tamanna inersimasunngornermi aappariinnermi, angajoqqaajunermi, suleqataanermi, sullissinermi ikinngutaanermilu ajoqusersuilersinnaasarpoq.

Pissutigalugu imminut tunulliuttuarsimaneq sungiusimanerani,

pisuni imminut salliuffissami imminut akigaluni iliuuseqartuarneq nukinik nungullaalertarmat.

Taamaammat blog-ip imarisartagassai ataatsimut taamatut qulequtsiunneqarsinnaapput: Sungiusimasat sungiusimajunnaagassat (qallunaatut: aflære).

Ikip mamikkiartorfia

Inuttut tamatta ineriartornissarput pisinnaatitaaffigaarput.

Inuttut nammatat nammineq pigisat,

kiserliornarsisarneri nangartarnagu blogip naqissuserpaa kisimiinngitsugut anniaatitsinni.

Ineriartornermi aatsaat pisarpoq arlaatigut annernartoqartillugu.

Soorlu meeraq timikkut alliartornermini saarngit anniaatigisarneratuut,

inersimasutut qamuuna inuttut ineriartuutigut annernaqqaartarput.

Tarnikkut ikigut mamikkiartulersarput oqaasinnguineq, timitaliinerlu aqqutigalugu.

Assersuutigalugu meeraanermi sungiussimasaq oqaluttuarinerasigut ersinngitsumik pissaaneqarnera piuneerukkiartutut ilersarpoq,

nammineq inuunitsinni oqaluttuartutut niperput ersarisseqqikkaangat.

Taamaammat ullumikkut aallartissinnaavugut immitsinnut aperaluta:

Inuuninni suna ujartortuartutut misigaara?

Apeqqutit makkua pinngilakka;

Atorfik suna ujartorpara?

Inuttut anguniakkakka suuppat?

Kisiannili ujartugaq qamuuna amigaatigiuartutut misigisaqarfik, suunera apeqquserpara.

Tamatta arlaatigut amigaatigisarput eqqumaffiginngisarput aqqutissiuiarmat inuunerup imartussusaata isumaanut.

Qamani nipaassuseq malugilernerasigut

ersarissisarpoq sunaanersoq taanna angerlarserfik, ujartortuagaq.

Nammineq apeqqummut akissutiga tassaavoq allanneq.

Ataatagigaluama inuusuttunngornermi angerlarsimaffik qimaqqaalerneraniilli oqaaqqissaartuarmanga ima:

Inuunermi artorsarfinni taarsiornerpaaffinni aqerluusaq pappiliarlu kammaginerpaasassaraat.

Taamatut oqarnermini ilasarnikuuaa naqissuserlugu;

Ilaanni toqqaannaq oqaasinnguinissaq inoqammut inornartutut misinnarsigaangat, oqaatigerusutat allaqqaarnerasigut oqilisaataasarmat.

Taamaammat unikaallalaarluta apeqqut una issiaqatigisigu:

Suna ujartortuartutut misigaara?

Malinnaalluarina.

Inuttut ataasiakkaatut oqaloqateqarnissaq pisariaqartikkukku saaffiginninnissannut tikilluaqqusaajuarputit.